Devletlü efendim hazretleri;
Dâhiliye Nezâret-i Celîlesi’nden bi’l-vürûd Şûrâ-yı Devlet’e havâle olunan tezkire üzerine Mülkiye Dairesi’nden tanzim ve leffen arz ve takdim kılınan mazbatada Mamûretülaziz vilayetinde kâʼin Hekimhan nahiyesi Bağdad tariki üzerinde bulunmakla beraber umrân ve terakkiye müsâʼid olduğundan nahiye-i mezkûrada Belediye Dairesi teşkili hususunun nezâret-i muşârün-ileyhaya havalesi lüzumu dermeyan kılınmış olmakla ol bâbda her ne veçhile irâde-i seniyye-i cenâb-ı hilâfet-penâhî şeref-sudûr buyrulur ise mantûk-ı münîfi infâz edileceği beyânıyla tezkire-i senâverî terkîm kılındı efendim.
Fî 9 Şevval sene [1]323 ve fî 23 Teşrinisani sene [1]321, [6 Aralık 1905]
Sadrazam Ferid
[Avlonyalı Mehmed Ferid Paşa (1903-1908)]
Maʻrûz-ı Çâker-i Kemîneleridir ki;
Resîde-i dest-i taʻzîm olup üzerine mûcebince irâde-i seniyye emr ü fermân hazret-i veliyyü’l-emrindir.
Konu:
Dahiliye Nezareti’nden gelip Şura-yı Devlet’e havale olunan yazı ve üzerine Mülkiye Dairesi’nden düzenlenip eklenen mazbatada Mamuretülaziz valiyeti Hekimhan nahiyesi’nin; Bağdat yolu üzerinde ve gelişmeye kabiliyeti olan bir yer olduğundan burada bir belediye dairesi teşkilinin gerekli olduğu yönündeki görüşün padişahın onayına sunulduğu.
Ve padişahın da buna onay verdiği.
Dâhiliye Nezâret-i Celîlesine
Devletlü Efendim Hazretleri
Hekimhan nahiyesinin bir kaza haline ifrağı ahali vekili İsmail İmzasıyla keşide olunan telgrafnâmede istidʻâ olunmuş ve Sivas ile Malatya arasındaki Bağdat tarikinin kurb ve civarında hükümet bulunmaması tarik-i mezkûrun ehemmiyetiyle münasip olmayacağı nazara alınarak Kangal ve Hekimhan mevkilerinin kaza haline tahvili evvelce nezkret-i celîlerine mütekaddem teşkilat defterine idhal edilmiş olmasıyla bu suret vilayetçe dahi tensip olunduğu hâlde iktizâ-yı hâlin nezâret-i celîlerine arz ve işʻârı Mamuretülaziz vilayetine yazılmış idi. Bu kere vilayet-i müşârün-ileyhadan cevaben vârid olan tahriratta Hekimhan’ın kaymakamlık teşkili esasen musib ve lâbüd ise de Akçadağ’ın lağvınca olan mütalaa Malatya Mutasarrıflığı’ndan istifsâr olunup alınan cevabnâmede mezkûr Akçadağ kazası ahalisinin kâmilen Ekrad ve aşâyir olmağla beraber Sünni ve Alevi bulunmak gibi ihtilâf-ı mezheb sâʼikasıyla arasıra yek-diğerlerine vukûʻ bulan taʻarruz ve tecavüzden dolayı orada muhafaza-i asayiş ve inkıyat için her vakit kuvve-i kâfiye bulundurulmakta olduğu hâlde kazanın lağvıyla kura-yı mülhakasının Hekimhan’a rabtı hâlen ve maslahaten caiz olmayacağından ibkâsıyla beraber kaza merkezinin Levend’e nakli ve mezkûr Akçadağ ile merkez sancağına mülhak Keban kazalarına baʻdiyet ve Hekimhan’a civâr ve karîb olan kura ve nahiyelerin dahi Hekimhan’a ilhakıyla bir kaymakamlık teşkili ezher-i cihet favâʼid ve muhsenâtı mucip olacağı bildirilmiş ve Meclis-i İdare-i Vilâyetçe dahi müzâkere-i maslahat olunarak fi’l-hakika Akçdağ kazasının şu suretle ehemmiyet-i maʻlûmesine mebni mebʻûs haritada gösterildiği üzere kaza-i mezbûrda ve Keban kazasından münasip karyelerin rabtıyla Hekimhan’ın başkaca bir kaza teşkili sureti tensip edilmiş olduğu işʻâr kılındığından keyfiyetin tensib-i veçhile nezâret-i celîlelerine arzı cevaben Mamûretülaziz’e yazılmıştır. Mârrü’z-zikr Bağdad Caddesi’nin ticâreten ehemmiyet-i fevkalâdesi hilâfına olarak güzergâh üzerinde merâkiz-i hükümet mefkûd ve bu münâsebetle turuk ve meʻâbirce müstelzim olan emniyet ve suhûletin her vakit muhâfazası emrinde müşkilât-ı maddiye mevcûd olduğundan sebk eden işʻâr-ı çâkirânem veçhile Mamûretülaziz’den Hekimhan ve Sivas’tan Kangal nahiyelerinin başkaca birer kaza haline ifrâğı zımnında iktizâ-yı hâlin icrâsı menût-ı reʼy-i âlî-i hazret-penâhîleridir. Ol bâbda emr ü fermân hazret-i men-lehü’l-emrindir.
Fî 2 Zilhicce sene [1]314 ve fî 23 Nisan sene [1]313
Adana’dan
Müfettiş-i Yâver-i Ekrem
Şakir
Konusu:
Sivas ve Malatya arasındaki Bağdad Yolu üzerinde emniyet ve asayişin temini için hükümetin herhangi bir kontrol mekanizması olmadığından bu güzergah üzerindeki Kangal ve Hekimhan nahiyelerinin kaza haline getirilmesine dair müfettiş ve yaver-i ekrem Şakir Paşa’ın Dahiliye Nezareti’ne sunduğu rapor.
Tarih: 4 Mayıs 1897
