Müze-i Hümâyûn
Nezâret Numarası : 3937
Müze Numarası : 71
Tarih : 6 Mayıs sene [1]333 [Miladi 6 Mayıs 1917]
Numara : 56
Malatya Mutasarrıflığının Tahrirâtı Üzerine
Ma‘ârif Nezâretine Derkenar
Malatya’ya bir sâ‘at mesafede Arslantepe nâm
mevkide âsâr-ı atîka taharrîsi için imtiyâz i‘tâsı hakkında Malatyalı Müftizâde Hoca Feyzi Efendi tarafından verilen istid‘ânâmenin ve teferru‘âtının leffiyle Malatya Sancağı Mutasarrıflığı’ndan meb‘ûs vâride-i âcizâneme muhavvel merbût tahrirât mütâla‘a-gizâr-ı âcizânem oldu. Âsâr-ı atîka nizamnâmesinin mevâdd-ı ma‘lûmesinde münderci olduğu üzere âsâr-ı atîka taharrisi içün imtiyâz verilmeyip âsâr-ı atîka ilminde ihtisâs ve mâlî iktidârı bulunanlara altı aydan iki seneye kadar müddetle hafriyât ruhsatnâmesi verilmekte olduğundan ve bununla beraber hafriyâtta çıkacak bilcümle âsâr ve meskûkât-ı atîka kâmilen Müze-i Hümâyûn’a ve ruhsatnâme harcı ve masârıf-ı hifriye ve komiser ma‘âşı ve harcırâhı vesâir bilcümle masârıf tamamıyla hâfire aid olup hâfir yalnız çıkan âsâr üzerinde tedkikât-ı fenniye[de] bulunmağla beraber dilerse âsârın fotoğrafı ve kalıplarını almakla iktifâ edeceğinden ve hâfire verilmek üzere bir kıt‘a nizamnâme leffen takdîm kılındığından nizâmnâmenin mütâla‘asından sonra tamamıyla nizamnâme ahkâmına ri‘âyet etmek üzere hafriyât yapmak istediği takdirde keyfiyetin iş‘ârı ve ne kadar müddetle ruhsatnâme isteyecek ise bu müddete göre nizamnâmede münderic ruhsatnâme harcıyla on buçuk guruş yol esmânının irsâli ve mevki-i mezkûrda hafriyât icrâsında cihet-i askeriye ve mülkiyece mahzûr olup olmadığının dahi inbâsı husûsunun cevâben izbâr buyrulması bâbında.
